Pep Guardiola thotë se do të “flejë më mirë” tani, pasi Jurgen Klopp ka njoftuar për largim nga Liverpooli – derisa ka lënë të kuptohet se ai mund të vazhdojë kontratën e tij me Manchester Cityn.

Klopp njoftoi të premten se do të largohet nga “Anfield” në fund të sezonit.

Liverpool e ka vendosur veten si konkurrent kryesor i Man Cityt gjatë kohës së gjermanit në Angli dhe Guardiola pranoi se do të jetë i më i qetë – teksa Kloppin e cilësoi si rivalin e tij më të madh.

“Do të fle më mirë”, tha ai, pas fitores 1-0 të Cityt ndaj Tottenhamit të premten.

“Ditët para se të luaja kundër Liverpoolit ishin pothuajse një makth. Sigurisht që ai do të mungojë. Unë u trondita, si të gjithë, nga lajmet. Ndjeva se një pjesë e Man City do të humbiste. Ne nuk mund ta përcaktojmë periudhën tonë këtu së bashku pa të dhe Liverpoolin; është e pamundur. Ata kanë qenë rivali ynë më i madh dhe personalisht ai ka qenë rivali im më i madh që kur ai ishte në [Borussia] Dortmund dhe unë në Bayern [Munich]”, shtoi spanjolli, raporton “ESPN”.

“Unë mendoj se Premierligës do t’i mungojë karizma e tij, personaliteti dhe mënyra se si luajnë ekipet e tij. I uroj atij gjithë të mirat”, vazhdoi ish-trajneri i Barcelonës.

Duke folur të premten pas njoftimit për largim, Klopp tha se i kishte mbaruar energjia e nevojshme për të vazhduar si trajner i Liverpoolit.

Guardiola, megjithatë, tha se pas më shumë se shtatë vitesh në “Etihad Stadium”, ai ende nuk e ka përjashtuar mundësinë e vazhdimit të kontratës së tij, e cila do të përfundojë në verën e vitit 2025.

Ai tha se beson se do të takohet përsëri me Kloppin në fushë, pavarësisht se Klopp tha se karriera e tij si trajner mund të ketë mbaruar.

“Ndoshta është një mendim që ai nuk do ta pranojë, por do të kthehet. E di. Ndoshta pas 10 vitesh, ai mund të ketë nevojë të rimbush energjinë e tij. Me personalitetin dhe energjinë e tij, ai do të kthehet. Kombëtarja, ekipet e tjera, nuk e di, por futbolli ka nevojë për personalitete si ai”, tha trajneri i “Qytetarëve”.

“Jam mirë. Unë dua ta bëj edhe një vit tjetër, dhe ndoshta të zgjasë [kontratën]. Jam mirë. Unë ende përpiqem t’ia dal”, deklaroi Guardiola. /Gazeta Express/